மிதிலைக் காட்சிப் படலம் - 648

வணங்கிய இராமனை வாழ்த்திச் சதானந்த
முனிவன் கோசிகன் பக்கம் சார்தல்

648.

வந்து எதிர்ந்த முனிவனை வள்ளலும்
சிந்தை ஆர வணங்கலும். சென்று எதிர்.
அந்தம் இல் குணத்தான் நெடிது ஆசிகள்
தந்து. கோசிகன்தன் மருங்கு எய்தினான்.
 
வந்து  எதிர்ந்த  -  (இங்ஙனம்) வந்து  தோன்றிய;  முனிவனை
- அம் முனிவனை; வள்ளலும் - வரையாது அருள் செய்யும் இராமனும்;
சிந்தை  ஆர  -  மனம்  மகிழ;  வணங்கலும்  -  அடி   வீழ்ந்து
வணங்கியபின்;   அந்தம்   இல்   குணத்தான்  -    எல்லையற்ற
நற்குணங்கள் வாய்ந்த அச்  சதானந்த முனிவன்;  ஆசிகள்   நெடிது
தந்து - (இராமனுக்கு)  ஆசி  மொழிகள்  மிகுதியும்  கூறி;   சென்று
எதிர் -  (தன்னை)   எதிர்கொண்ட;   கோசிகன்  தன் மருங்கு -
 விசுவாமித்திரன் அருகில்; எய்தினான் - அடைந்தான்.  

வள்ளல்: அகலிகைக்கு அருள் செய்தமை கருதியது. 85